ສູນກາງຊາວໜຸ່ມ ຈັດຕັ້ງ ຮັບຟັງປາຖະກະຖາ ວັນສ້າງຕັ້ງກອງທັບ ຄົບຮອບ 65 ປີ

ຕອນເຊົ້າວັນທີ 14 ມັງກອນ 2014 ທີ່ຫໍວັດທະນາທຳແຫ່ງຊາດ ສູນກາງ ຊາວໜຸ່ມປະຊາຊົນປະຕິວັດລາວ ໄດ້ຈັດຕັ້ງປາຖະກະຖາເພື່ອຫວນຄືນມູນເຊື້ອ ວັນສ້າງຕັ້ງກອງທັບປະຊາຊົນລາວ ຄົບຮອບ 65 ປີໂດຍການໃຫ້ກຽດ ປາຖະກະຖາຂອງທ່ານພົນເອກ ສີສະຫວາດ ແກ້ວບຸນພັນ ອະດີດກຳມະການ ກົມການເມືອງສູນກາງພັກ ເຂົ້າຮ່ວມຮັບຟັງມີທ່ານ ດຣ. ວິໄລວົງ ບຸດດາຄຳ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ມີຄະນະນຳ ກົມກອງອ້ອມຂ້າງ ພ້ອມດ້ວຍສະມາຊິກພັກ ພະນັກງານຫລັກແຫລ່ງເຂົ້າຮ່ວມ.

ທ່ານພົນເອກ ສີສະຫວາດ ແກ້ວບຸນພັນ ໄດ້ຍົກໃຫ້ເຫັນເຖິງການກຳເນີດ ແລະ ເຕີບໃຫ້ຂະຫຍາຍຕົວ ຂອງກອງທັບປະຊາຊົນລາວ ຊຶ່ງໄດ້ປະກາດ ສ້າງຕັ້ງຂື້ນໃນວັນທີ 20 ມັງກອນ 1949 ຢູ່ເຂດລາວຮຸ່ງພຽງສາ ເມືອງຊຽງຄໍ້ ແຂວງຫົວພັນ ໂດຍແມ່ນອະດີດປະທານ ໄກສອນ ພົມວິຫານ ເປັນຜູ້ກໍ່ຕັ້ງຂື້ນ ພ້ອມກັນນັ້ນ ທ່ານຍັງົໄດ້ຍົກໃຫ້ເຫັນ ມູນເຊື້ອການຕໍ່ສູ້ ອັນພິລະອາດຫານ ຂອງ ກອງທັບປະຊາຊົນລາວ ຕ້ານພວກຈັກກະພັດລ່າເມືອງຂື້ນ ທັງແບບເກົ່າ ແລະ ແບບໃໝ່ໃນແຕ່ລະໄລຍະຈົນໄດ້ຮັບໄຊຊະນະສາມາດປົດປ່ອຍປະເທດຊາດ ແລ້ວສ້າງຕັ້ງປະເທດເປັນ ສາທາລະນະລັດ ປະຊາທິປະໄຕ ປະຊາຊົນລາວ ຂື້ນ ໃນວັນທີ 2 ທັນວາ 1975 ຊຶ່ງພາຍຫລັງປະເທດຊາດໄດ້ຮັບການປົດປ່ອຍແລ້ວ ກອງທັບປະຊາຊົນລາວກໍຍັງສືບຕໍ່ປະຕິບັດສອງໜ້າທີ່ຍຸດທະສາດຄື ປົກປັກຮັກສາ ແລະ ສ້າງສາພັດທະນາປະເທດຊາດ ປະກອບສ່ວນຜົນງານຢ່າງໃຫຍ່ຫລວງ. ການຈັດຕັ້ງປາຖະກະຖາໃນຄັ້ງນີ້ ມີຈຸດປະສົງເພື່ອເຮັດໃຫ້ຄະນະນຳ ພະນັກງານ ສະມາຊິກພັກ ພາຍໃນ ແລະ ກົມກອງອ້ອມຂ້າງສູນກາງຊາວໜຸ່ມໄດ້ເຊື່ອມຊຶ່ມ ກຳແໜ້ນ ແລະ ຮູ້ແຈ້ງຕໍ່ຜົນງານ ແລະ ວິລະກຳ ອັນພິລະອາດຫານ ຂອງ ກອງທັບປະຊາຊົນລາວ ທີ່ຍາດມາໄດ້ຕະຫລອດໄລຍະ 65 ປີຜ່ານມາ ພ້ອມທັງ ເປັນການສຶກສາອົບຮົມໃຫ້ຄົນຮຸ່ນໃໝ່ໄດ້ຮໍ່າຮຽນເອົານໍ້າໃຈຮັກຊາດ ນໍ້າໃຈຕໍ່ສູ້ ອັນເດັດດ່ຽວບໍ່ຍອມຈຳນົນ ແລະ ນໍ້າໃຈເສຍສະຫລະອັນສູງສົ່ງຕໍ່ປະເທດຊາດ ຂອງກອງທັບປະຊາຊົນລາວ. ຂ່າວ/ພາບ: ເທພະວົງສອນ



0 ຄຳເຫັນ